تعبتتى الدنيا ياما / بقلم الشاعرة هناء محمود

تعبتني الدنيا يامايا
عملاني فيلم وحكاية
ودايسة عليا من الاول
وجاية عليا ع الاخر
وحالفة مادوقش فيها
الحلو
تسقيني المر بكاساته
وحشني حضنك الدافي
وصوتك وقلبك الوافي
وحشتني عنيكي ولمعتها
وجمال روحك وضحكتها
وحشتني نفسي وانا جمبك
وراسي حبيبتي علي حجرك
وايدك رايحة كدة وراجعة
تملسي بيها علي شعري
وحشتني كل حكاويكي
وخطاويكي
وشراسة بشوفها في عنيكي
وقوة بشوفها في حبيبتي
لو مرة اشتكي ليكي
من حد عبيط بيئذيني
ساعتها بخاف عليه منك
ههههه مانا عارفاكي
تاكلي الكل بسنانك
عشان بنتك
تعبتني الدنيا يامايا
كدة في بعدك
بقيت مطفية حزنانة
وعايشة وروحي موش
عندي
وفرحة قلبي من بعدك
تحارب فيا وفي عندي
اعاند فيها واقتلها
لو مرة تيجي بالصدفة
حرمت الفرح علي نفسي
حرمت السعد علي قلبي
قوليلي ازاي احس الفرح
قوليلي ازاي ادوق سعدي
وانا روحي معانداني
وساكنة معاكي ياحبيبتي
هناء محمود...ام عبير