كلام محبوك / محمد زرواني/ مجلة خمائل

طريق الفول دوازة
والقمح التامر يعجب ف
النظرة
و لحجلة لخفيفة من
سعد الصيادة
ما جات بالقدود ولا
حموريت لخدود
حق المظيوم
عند الله محفوظ
ؤ سهم الدلو
طالع امعلق
هابط مشنوق
لا يغرك انباح لكلاب الرومية
من السهالة اتجيب الطماعة
و لي مولف الظل
ايدخل الدل و يطول الدزة
ما يليق لحرث ودراس
ما تثمر فيه عولة
القمح الزربان ما دريه امداري
ما يجمعو حصاد ف غمار ما يعرف مطة
وعسل الجبح ايداوي كحال العين
بيه اتزول العلة
اللهم ارباح مستور ولا خصارة مشنوعة
الناع عل الصوف دافي ف قصور
ولفقير فراشو شكون ف حطة
درت راسي اضرير
ؤ عشت حوال القهرة
الما (ء) يغسل الجدام ويحيد اللهاته من شلا قلوب معلولة
لمصبط يعفط عل لحفيان
والشبعان ما يقسم فولة
ولد السبع ايحن ف خوه
ؤ ولد الديب ايساوم بعظة
حركت الماعون باش الحق ايبان
قالو هدا قاري حسيفة
الي شرج شي دحش
يبغي يسبق الخيل
عرفو قليل وفهامتو محدودة
حال ما يحشم من حال
قلة الاصل عادت موضة
المكلفة عل النفس حرام
الصوف يافهم معدودة شريفة
ما تنجو معفونة
الميت عزاه سكر
والمولود ملزوم بالزرورة