حياة / بقلم الشاعر مختار فوده

سوزان عبدالقادر الخميس فبراير 16, 2017 7:25 pm

حياة ................................*
بنت جدعه مصريه
على الأدب متربيه
تقوم ويا أبوها وأخواتها من الفجريه
أخ يضرب على المجداف
وأخ يفرد غزل الشبك
وأخت ترمى بالحداف
ويارازق من الميه السمك
والأم تربى وتراعى
جنب جوزها دراعك بدراعى
وتمر بينا الأيام
نزرع على الحد كام بوره
يعنى شامى وكرنب وفلفل وبتنجان
ناكل وتاكل الفروج وتترزق حتى الزرزوره
وصبرنا على نفنسنا ولا فى يوم نتهان
يا نخله على النيل والبلحه عجويه
ياتوته مايله بعسلك الأبيض مطاطيه
يا سنديان بكره أبقى عروسه وألبس الفستان
وواد عمى يفرحنى بكفوفى المحنيه
ياليله ورا ليله
فيها ضى القمر منقاد
ياعمر بيمر يا أصيله
وهبقى عايزه أيه عاد
أنا حياة .......
ودى عيلتى ودى ناسى
وده أدبى وده علمى فى كراسى
وبتعلم كل يوم حاجه
يارب ما تخليلنا عند الناس حاجه
أنا العاشقه لنيلك
عايشه فيه ومشتاقه
وميت سلام وتحيه
بكل جدعنه ومرجليه
لكل شقيان يكد بجد
وعمره ما وطى راسه لحد
ها أيه رأيكم فيا .....
مش أبقى بجد حياه .....................................................*
الشاعر مختار فوده
13 فبراير 2017