البنت اللى بتكتب شعر / بقلم الشاعرة هناء محمود

البنت اللي بتكتب شعر
قالوا عنها كتير ياما كلام
قالوا مجنونة
قالوا عشقانه ولهانة
وواقعة ياعيني في حب خطير
قالوا دي فاضية وعاملة قاضية
تحكم وتطالب بالتغيير
قالوا دي اخرها في طبخة
وشقة تروقها وكام طير
فيه قالوا عليها حساسة
وسلاحها وروحها في قلمها
وكراس والشعر واحساسها
البنت اللي بتكتب شعر
عاملالها عالم خاص
وحده الحب ومشاعره
والطيبة والاخلاص
يادوب دول سكانها
في دنيتها وعالمها الخاص
تكتب من جوة القلب
وكلامها زي الماس
حابة الحب وعذابه
وحابة الدنيا بغباوتها
تكتب مرة ع الحمد
للمولي رب الناس
وتكتب مرة بالمدح
في حبيبنا رسول الله
وتذم بجرأة ياناس
حكام الخزي وعار
سلبوا اطفالنا حقوقهم
لاعبوهم بالدم ونار
في بورما بيحرقوا فيهم
وف سوريا تاهت خطاويهم
وتقول ارحمنا ياربي
ادري انت بينا وبيهم
تكتب وتحلم بالوحدة
وتتمني سلام ورخاء
البنت اللي بتكتب شعر
بتجمع في خيوط مشاعرها
وتنسج احلي رداء
مرة تكتب حب ف حب
مرة شوق ومرة رثاء
مرة تعاتب مرة تلوم
مرة بتتعب من الاشواق
وخلاصة القول ومن الاخر
البنت اللي بتكتب شعر
بتهرب من دنيا ظالمة
لدنيتها وعالمها الخاص
هناء محمود...ام عبير