يا حلوة / بقلم منصور عبد المقصود

الحلوة
.......
يا حلوة وانت مروحة بالليل
غنى القمر
على حسن بادى ف خطوتك
لمى الغناوى فى مشيتك
ورقصى قلب الجدع
الحزن كلبش جتته
سرقت خدودك دمعته
لما ضرب قلب الودع
ورماكى بالسبع العجاف
رابطين على بطنك حجر
لما فتحلك مندله
كل اللى كان عايش فى روحه بيشبهك
بقى يشبهه
الطيبة والروح الأبية فى منظره
بتدارى نار
عايشة بتحضن جوهره
يا شمس قومى والسعى كتف الولد
وهزهزى ضهره اللى صابح منحنى
اوعى رقبتك تنتنى
يا حافر النور فى الضلام
يا راسم الوردة على جدار الالم
أصرخ ووبخ فى التلم
اللى سقاه الليل برود
فين لما كان حاكمك اسود
يا خالقة ميت مليون غنى
متصدقيش الاغبيا
ولا تسمعيش للأوليا
اللى ولائهم بالأيجار
واللى باعوكى بالدينار
رسموا على قلبك جدار
سهمين بدون حرفين رشق
واحد فى عين كل اللى باع
وواحد فى عين المشترى
يا نسمة صابحة بتلعنى
لا تلعنى
هى حدودهم ضيقة
عايشين حياة من غير افق
مشفوش ملوك وبتنحنى على باب جلالتك يا هرم
ولا شافو ابنك يوم بنى ارض النبى والمكرمة
ولا شافو مليون اجنبى
عايشين فى حضن الاعمدة
وأنا فى انتظارك تندهى
والكل هيلبى الندا
كل اللى باعك بالدولار
واللى منع عنك سولار
مصيره ضرب الاحذية
منصور عبد المقصود