قدر مكتوب بقلم الشاعرة / مى يحى

سوزان عبدالقادر الجمعة يناير 27, 2017 5:20 pm

جمعنى بيك القدر
والحلم كان وردى
ف قلوبنا متبروز
هنعيش لآخر مدى
ويعدى بينا العمر
نكبر سوا نعجز
حالفين ما نتفارق
وإن حد فينا شكى
على بعض نتعكز
بعنينا خدنا وعود
وفرحنا بالأيام
وف السما طرنا
وتملى كنا نقول
الحزن دا مخلوق
أكيد ل ناس غيرنا
كل الحياه ضحكة
ولا مرة كان البعد
وارد ف تفكيرنا
فاتت ساعات وسنين
وما بين سعادة وآه
كانت يادوب ثانية
وقف الزمن فيها
وإتبدلت أحوال
وإتغيرت دنيا
شكل الحياه إختلف
ملقيتش ضحكتها
موجودة حواليا
مالت غصون الشجر
بطل يغنى الطير
والقلب صابه سكوت
مشهد سريع عدى
غامض ومش مفهوم
مليان ب زحمة وصوت
كان ف القدر مكتوب
إن الفراق هيكون
على إيد ملاك الموت
#مي_يحيى
#قدر_مكتوب
#حالة_خاصة
#زحمة_كُتاب
#جناح_زحمة_كُتاب_صالة2
#معرض_القاهرة_الدولي_للكتاب_٢٠١٧
#قراءة
#شعراء_عامية