بيقولولي قال... بقلم الشاعر سامح لطف الله _ مجلة عالم الأدباء

بيقولولي قال

بيقولولي قال تقشف
واقتصد واربط حزام
قلت ليهم طب
ياريتكم تبقوا زيي
وتعملوا نفس الكلام
هو اكل الفول تقشف؟
هو منع اللحمة سام؟
والفراخ راحت عليها
والسمك ف البحر عام
عام براحته وكل راحته
مين هياكله بالجرام؟
الحزام مربوط في وسطي
يسند الضهر وتمام
انتوا شفتوا الدنيا والعة
حد بسأل ايه بكام
اللي يغلي ارميه في ضهري
واللي يعلا بالسلام

بيقولولي قال  تقشف
والقشف برطع ونام
عيد  وداخل بالسلامة
والجيوب صيني وتمام
واللي أمره عند ربه
شكوته للناس حرام

سامح لطف الله